पोखरा- नेपाली काग्रेसका केन्द्रीय सदस्य अर्जुननरसिंह केसीले सरकारले नेत्रविक्रम चन्द (विप्लप) समूहलाई प्रतिबन्ध लगाउनु अलोकतान्त्रिक भएको बताएका छन् ।

बिहीवार प्रेस युनियन कास्कीले पोखरामा आयोजना गरेको पत्रकार सम्लेनमा बोल्दै उनले विप्लव समूहलाई सरकारले प्रतिबन्ध लगाएर देशलाई द्वन्द्वमा धकेलेको आरोप लगाए । 

‘विप्लवका गतिविधिमाथि निगरानी गरेर नियन्त्रणमा लिनुपर्‍थ्यो । पार्टीमामाथि नै प्रतिबन्ध लगाउन मिल्दैन,' उनले भने, 'राजनीतिक पार्टीमाथि प्रतिबन्ध गर्ने काम अलोकतान्त्रीक र संविधान विपरीत हो ।’ नेता केसीले सरकारले पार्टीको मान्यता दिएको र स्थापित पार्टी भएका कारण उसले गरेका गतिविधिलाई नियन्त्रण गर्नुपर्ने बताउँदै पार्टीलाई नै प्रतिबन्ध गर्नु सरकारको गैरकानूनी कार्य भएको बताए ।

पूर्वमन्त्रीसमेत रहेका केसीले जनताको सुरक्षा र स्वतन्त्रता सुनिश्चित गर्ने दायित्व सरकारको भएको भन्दै सीके राउतसँग भएको सम्झौता गलत भएको बताए । विखण्डकारी नेता सीके राउतसँग आफ्नै पार्टीभित्र र प्रतिपक्षसँग छलफलसमेत नगरी राष्ट्रघाती सम्झौता गरेको नेता केसीले आरोप लगाए । ‘सीके राउतसँग सरकारले सम्झौता गर्नुपूर्व पार्टीभित्र र बाहिर आवश्यक छलफल गरेर मात्र सम्झौता गर्नु पर्‍थ्यो,' उनले भने, 'तर सीके राउतले जनमत संग्रहको कुरा गर्दा गर्दै देशलाई टुक्र्याउनेसम्मको अभिव्यक्ति दिनेलाई मुलधारको राजनीतिमा ल्याउनु दुःखद हो ।’

नेता केसीले सरकारले जेलबाट सीके राउतलाई छुट्ट्याएर ११ बुँदे सहमति गर्नु नाटक भएको टिप्पणीसमेत गरे । ‘विखण्डनकारीलाई जेलबाट छुट्ट्याएर ११ बुँदे सहमति गर्नु नाटकीय शैली हो,’ उनले भने ।