सुदूरुपश्चिममा कतै विप्लवको त्रास, कतै कांग्रेस-नेकपा कार्यकर्ताबीच कुटाकुट !

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

धनगढी – मंगलबार दिनभर सुदूरपश्चिमका जिल्लाहरू अशान्त रहे ।

नेत्रविक्रम चन्द विप्लव नेतृत्वको नेकपाले आह्वान गरेको बन्दका कारण बिहान पौने ५ बजे कैलालीको गौरीगंगा नगरपालिका भवनमा बम विस्फोट भयो ।


Advertisement

जिल्ला प्रहरी कार्यालय कैलालीका प्रहरी निरीक्षक प्रकाश धामीका अनुसार बम विष्फोटबाट भवनको झ्यालको शिशा चर्केको छ, तर ठूलो क्षति हुनबाट भने जोगियो ।

सरकारद्वारा प्रतिबन्धित विप्लव समूहले आह्वान गरेको बन्दको क्रममा नगरपालिकाको भवनमा बम विस्फोट गराइएको प्रहरीको अनुमान छ ।


Advertisement

सुदूरपश्चिम प्रदेशबाट सञ्चालित छोटो तथा लामो दूरीका यातायात सेवा, कलकरखाना, शैक्षिक संघ-संस्था बिहानैदेखि ठप्प रहे ।

उता, नगरसभामा बोल्न नदिएको झोकमा मन्त्रीले बोल्ने क्रममा जेनेरेटर बन्द गराइएको घटना आयो ।

शुभकामना मन्तव्य राख्न नदिएको भन्दै कैलालीको गोदावरी नगरपालिकाको नगर सभामा अवरोध सिर्जना गरिएको थियो ।

अत्तरिया उद्योग वाणिज्य संघका तर्फबाट सभामा शुभकामना मन्तव्य राख्न नदिएको भन्दै व्यापारीहरूले जनेरेटर बन्द गर्दै अवरोध सिर्जना गरेको जनाइएको छ । तर अवरोधका बीच सभा सुचारू गरिएको थियो ।

त्यस्तै, कञ्चनपुर जिल्लामा नेकपा र कांग्रेस कार्यकर्ताबीच झडप हुँदा २ जना घाइते भएका छन् । जिल्ला प्रहरी कार्यालय कञ्चनपुरका प्रहरी उपरीक्षक दिनेश आचार्यका अनुसार खानेपानी मन्त्री बीना मगरलाई कालो झण्डा देखाउन खोज्दा कांग्रेस कार्यकर्ता र नेकपा कार्यकर्ताबीच दोहोरो झडप भएको हो ।

प्रहरी उपरीक्षक आचार्यका अनुसार मन्त्री मगर बेलौरी र पुनर्वासको नगरसभा उद्घाटनका लागि जाने क्रममा कञ्चनपुरको डोकेबजारमा झडप भएको थियो ।

झडपमा परी तरुण दलका नेता राम खड्का, नेपाली कांग्रेस कार्यकर्ता विक्रम चन्द घाइते भएका छन् । तर आक्रमण गर्नेलाई प्रहरीले नियन्त्रणमा लिन नसकेको प्रहरीले जनायो ।

कमेन्ट गर्नुहोस्