समाजवादी पार्टीका संघीय परिषद् अध्यक्ष एवं पूर्वप्रधानमन्त्री डा. बाबुराम भट्टराईले प्रत्यक्ष निर्वाचित कार्यकारी राष्ट्रपति र पूर्ण समानुपातिक संसद्को व्यवस्था गर्नुपर्नेमा जोड दिएका छन् ।

राष्ट्रपति विद्यादेवी भण्डारीले नेकपाको स्थायी कमिटी बैठक चलिरहेका बेला नेताहरूलाई निवासमै बोलाएर भेटेको र उक्त कुराबाट नेकपा अध्यक्ष प्रचण्ड रिसाएको आसयको एक समाचारमा देवेन्द्रराज पाण्डेले गरेको ट्वीटलाई मेन्सन गर्दै बाबुरामले कार्यकारी राष्ट्रपतीय प्रणालीमा जानुपर्ने उल्लेख गरेका हुन् ।

सेरेमोनियल राष्ट्रपतिबाट संविधान, परम्परा र नैतिक आचरणविपरीत काम हुनु नहुनेमा समेत उनले जोड दिएका छन् ।

बाबुरामले ट्वीटमा लेखेका छन्– 'देश र जनताप्रति अलिकति पनि दायित्वबोध छ भने प्रत्यक्ष निर्वाचित कार्यकारी राष्ट्रपतीय प्रणाली र पूर्ण समानुपातिक संसद्को व्यवस्था गरौं; वर्तमान सरकारसँग दुइतिहाइ बहुमत छँदैछ! हैनभने सेरेमोनियल राष्ट्रपतिबाट एकपछि अर्को संविधान, परम्परा र नैतिक आचरणविपरीत कार्य नहोस्! जो अगुवा उही..?'

देश र जनताप्रति अलिकति पनि दायित्वबोध छ भने प्रत्यक्ष निर्वाचित कार्यकारी राष्ट्रपतीय प्रणाली र पूर्ण समानुपातिक संसदको व्यवस्था गरौं;वर्तमान सरकारसंग दुइतिहाइ बहुमत छँदैछ!हैनभने सेरेमोनियल राष्ट्रपतिबाट एक पछि अर्को संविधान,परम्परा र नैतिक आचरण विपरित कार्य नहोस्!जो अगुवा उही..? https://t.co/PDqwRmFY2i

— Baburam Bhattarai (@brb1954) December 23, 2019