अफगानिस्तानको राजधानी काबुलको पश्चिमी इलाकामा आतंकवादीहरूले मंगलवार एक प्रसूति अस्पतालमा आक्रमण गर्दा दुई नवजात शिशुसहित १४ जनाको मृत्यु भएको छ । 

त्यहाँको गृह मन्त्रालयले जारी गरेको तस्वीरमा अस्पतालबाट अनेकौं शिशु र आमाहरूलाई सुरक्षित निकालिएको देखिन्छ । सामाजिक सञ्जालमा दुई मृतक नवजात शिशुहरूको तस्वीर भाइरल बनिरहेको छ । 

आतंकको भयानक अनुहार देखेर मानिसहरू भावुक भए । यी शिशुहरूको के दोष थियो र भनी उनीहरू प्रश्न गरिरहेका छन् । 

गृह मन्त्रालयका प्रवक्ता तारिक एरीनले अस्पताल भवनबाट १०० जना आमा र शिशुलाई निकालिएको जानकारी दिए । महिला, पुरुष र शिशु सहित १५ जना घाइते भएका छन् । तीन विदेशी नागरिकलाई सुरक्षित निकालिएको छ । 

कम्तीमा तीनजना आक्रमणकारीले प्रहरीको बर्दी लगाएर अस्पताल प्रवेश गरेको अनि ग्रिनेड तथा गोली प्रहार गरेको अधिकारीहरूले बताए । 

अस्पतालबाट भागेका एक बालरोग विशेषज्ञले दश्ती बार्चीस्थित अस्पताल भवनको प्रवेशद्वारमा विस्फोटको ठूलो आवाज सुनेको बताए । दश्ती बार्ची शियाबहुल क्षेत्र हो र त्यसलाई आईएसका सशस्त्र समूहहरूले तारो बनाउने गरेका छन् ।