कांग्रेसले फाइदा बेफाइदा सोच्दैन, अलोकतान्त्रिक कदमको डटेर प्रतिरोध गर्छ – रामचन्द्र पौडेल

नेपाली कांग्रेसका वरिष्ठ नेता रामचन्द्र पौडेलले संसद विघटनको विरोधमा कांग्रेसले डटेर विरोध गर्ने बताएका छन् ।

मंगलवार राजधानीमा आयोजित राष्ट्रिय दलका नेताहरूबीच भएको अन्तरक्रिया कार्यक्रममा बोल्दै पौडेलले कांग्रेसले असंवैधानिक र अलोकतान्त्रिक कदमको विरोध गर्ने बताएका हुन् ।

'यतिबेला कांग्रेसलाई फाइदा भयो कि बेफाइदा भयो भन्ने कुरा गौण हो,' वरिष्ठ नेता पौडेलले भने, 'मुख्य कुरा राष्ट्र र संविधानमाथि कसरी धोका भयो भन्ने हो । जनतामाथि धोका भएको छ, मतदातामाथि विश्वासघात भएको छ । यसको डटेर विरोध गर्नुपर्छ ।'

संसद विघटन असंवैधानिक र अलोकतान्त्रिक भनिसकेपछि कांग्रेसले आन्दोलन गर्ने क्रममा 'मोही माग्ने ढुङ्ग्रो लुकाउने'काम नगर्ने उनले बताए ।

'यसको डटेर विरोध गर्नुपर्छ । हाम्रो पार्टी सर्वसम्मत छ,' पौडेलले भने, 'कस्तो विरोध भन्ने कुरा आएपछि, मोही माग्ने ढुङ्ग्रो लुकाउने कुरा छैन । असंवैधानिक र अलोकतान्त्रिक काम सच्चिनुपर्छ ।'

उनले सर्वोच्च अदालतले पनि संविधानको धारा, अक्षर र भावनालाई कदर गर्ने गरी फैसला गर्ने आफ्नो विश्वास रहेको बताए ।