पानी बाराबारको स्थितिमा पुग्यो शिव श्रेष्ठ र करिश्मा मानन्धरको सम्बन्ध

शिव श्रेष्ठ र करिश्मा मानन्धर नेपाली चलचित्रमा रुचाइएको जोडी मानिन्छ । ट्रक ड्राइभर, आशीर्वाद, मनकामनाजस्ता चलचित्रमा उनीहरुले सँगै काम गरे । दर्शकले यी चलचित्रमा गरेको कामलाई मन पराए । तथापि, १ दशकदेखि उनीहरूको जोडीलाई पर्दामा देख्न पाइएको छैन ।

एकले अर्कालाई असाध्यै सम्मान गर्ने शिव–करिश्माको सम्बन्धमा एकाएक फाटो आएको छ । यसको एउटै कारण हो, चलचित्र एउटा यस्तो प्रेम कहानी ।

यो चलचित्रबाट करिश्माकी छोरी कविताले डेब्यु गरेकी थिइन् । चलचित्रबाट शिवका छोरा शक्तिले समेत चलचित्र उद्योगमा पाइला चालेका थिए ।

लामो समयपछि शिवले चलचित्र बनाउन लागेकाले चलचित्र निर्माण हुँदा देखिनै यो प्रोजेक्टलाई लिएर एक किसिमको चासो थियो । तर, चलचित्र प्रदर्शन भएकै दिनदेखि यसले पानी समेत भन्न पाएन ।

चलचित्र नराम्रोसँग फ्लप भयो । एक प्रसंगमा शिवले केहि साथीभाइहरूसँग हिमालय जाभामा कफी खाएको पैसा समेत रिटर्न नभएको भन्दै दुःखेसो पोखेका थिए ।

चलचित्र पत्रकार, समीक्षक र दर्शक कसैले पनि चलचित्रलाई मन पराएनन् । स्वयं प्रिमियरमा पुगेका अथितिहरूले समेत चलचित्रलाई खासै मन पराएनन् । यो चलचित्र शिवको करिअरमा सबैभन्दा पत्ता साफ चलचित्र बनेको छ ।

छायांकन सुरु भएको केहि महिनामै चलचित्रको सम्पुर्ण काम रोकिएको यो चलचित्रका अन्य काम पुरा नगरेर चलचित्र प्रदर्शनमा ल्याइएको बताइन्छ ।

सोहि कारण करिश्मा रिसाएकी थिइन् । चलचित्रका बाँकी काम सम्पन्न गरेर पुर्ण तयारीका साथ यसलाई प्रदर्शन गर्न करिश्माले शिवलाई पटक पटक सुझाव समेत दिएकी थिइन् । तर, शिवले कसैको कुरा नसुनेर एकाएक चलचित्र प्रदर्शनमा ल्याए । त्यसपछि करिश्मा झन् रिसाएकी हुन् ।

करिश्माले केही समय अघि पोस्ट गरेको स्ट्याटसले समेत उनीहरुको सम्वन्ध पानी बाराबारको स्थितीमा पुगेको अनुमान गर्न गाह्रो पर्दैन । उनले चलचित्रको शीर्ष गीत शेयर गर्दै घुमाउरो तरिकाले भनेकी छिन्, ‘अरुलाई दोष दिएर महत्वपुर्ण बनाउन चाहन्नँ । तर, बच्चा त राम्रो थियो ।’

चलचित्रमा प्रियंका कार्की, वर्षा राउतलगायतका कलाकारहरुको त डबिङ समेत गरिएन । स्क्रिप्टभन्दा फरक चलचित्र ल्याएको भन्दै सोहि चलचित्रका कलाकारले चलचित्र प्रमोशनलाई वहिस्कार गरेका थिए । छोरीले पहिलो चलचित्र नै कमजोर बनाएकोमा असाध्यै मन दुखाएको भन्दै करिश्माले अब जस्तो पायो त्यस्तो चलचित्रमा छोरीलाई काम नगराउने अडान राखेकी छिन् ।

करिश्माले छिट्टै एक चलचित्र बनाउने तयारी समेत गरेको बुझिएको छ ।