राष्ट्रिय जनमोर्चाले बहुचर्चित अमेरिकी आर्थिक सहयोग परियोजना मिलेनियम च्यालेन्ज कर्पोरेसन (एमसीसी) अगाडि नबढाउन प्रधानमन्त्री शेरबहादुर देउवाको ध्यानाकर्षण गराएको छ ।

प्रधानमन्त्री निवास बालुवाटारमा बुधवार बिहान बसेको सत्ता गठनबन्धनको बैठकमा जनमोर्चाले एमसीसी अगाडि बढाए गठबन्धन छाड्ने चेतावनी दिएको हो । 

बैठकमा जनमोर्चा अध्यक्ष चित्रबहादुर केसीले नयाँ सरकारसँग जनताका अपेक्षा धेरै भएकाले एमसीसीको विवादमा नफस्न आग्रह गरेका हुन् ।

‘यतिधेरै विरोध हुँदाहुँदै एमसीसी पारित गर्न तपाईंहरू किन हतार गर्दै हुनुहुन्छ ? एमसीसी पारित गरियो भने हामी गठबन्धनमा रहँदैनौं,’ केसीको भनाइ उदृत गर्दै बैठक स्रोतले भन्यो । 

गठबन्धनको बैठकले एमाले वरिष्ठ नेता माधव नेपालसँग समेत छलफल गरेर आजभोलिमै मन्त्रिपरिषद् विस्तार गर्ने निर्णय गरेको स्रोतले बतायो ।

बैठकमा नेपाल पक्षबाट विजय पौडेल सहभागी थिए ।