नामः रविकुमार सिंह 

जन्मः लाटीकोइली– ७ सुर्खेत

स्थायी बासस्थान : टीकापुर– ९, कैलाली

जन्म मिति : २०३५ भदौ १६ 

काम गर्ने स्थान : रोयल हाइड्रो कन्स्ट्रसन कम्पनीको सीईओ र इञ्जिनीयर,

साथमा सुजुकी कम्पनीका दुईवटा गाडी (सेतो र खैरो), २ वटा मोटरसाइकल 

देव विकास बैंकमा खाता, ग्लोबल आइएमई बैंकमा खाता, बैक अफ काठमाडौंमा खाता  र तिनका एटीएम साथै मास्टर कार्ड, कल्ब कार्ड । हाइफाइ लाइफ स्टाइल । 

झट्ट हेर्दा जो कोहीले भन्छ, यो त ठूलै मान्छे रहेछ । १०/२० लाख नपत्याउने कुरै भएन । तर उसको यो पहिचान नक्कली हो । बरु वास्तविक नाम शेरसिंह भन्ने रवि सिंह हो ।

भारतको हिमाञ्चाल प्रदेश रामपुर गसेरा जिम्लाको नोगली पञ्चायत घर भएको सिंह ललितपुरको महालक्ष्मी नगरपालिका– ५ सेतीपाखा बस्दै आएको थियो ।

उसले कसरी बनायो यो पहिचान ? कसरी जुटायो गाडी र बाइक ? यो रहस्य तब खुल्यो जब चुरियामाई इन्टरप्राइजेज जडिबुटीका सञ्चालक कृष्णहरि गौतमले महानगरीय अपराध महाशाखामा उजुरी दिए ।

बजाज कम्पनीको डोमिनार– ४०० सीसीको मोटरसाइकल ३ लाख ३० हजारमा खरिद गर्ने भन्दै ३० हजार दिएर २०७७ पुस २९ गतेदेखि बेपत्ता भएपछि गौतमले महाशाखामा उजुरी दिएका थिए ।

त्यसपछि प्रहरीले उसको खोजी शुरू गरेको थियो । ऊ कहिले पूर्व, कहिले पश्चिम पुगेर लुक्दै आएको थियो । महाशाखाका प्रवक्ता प्रहरी उपरीक्षक (एसपी) कृष्णप्रसाद कोइरालाका अनुसार ऊ जहाँ जान्थ्यो, त्यहीँ ठग्ने रहेछ ।

‘ऊ जहाँ गयो, त्यहीँ ठग्ने रहेछ । ढल्केबरमा खाना खाने ठाउँमा समेत १० लाख ठगेको रहेछ,’ एसपी कोइरालाले लोकान्तरसँग भने, ‘म ठेकेदार हुँ । अहिले पैसा अड्किएको छ, आएपछि दिउँला भन्दै फसाएको प्रारम्भिक अनुसन्धानमा देखिएको छ ।’

यो त उसको सानो ठगी हो । उसले रुपन्देहीको बुटवल उपमहानरपालिका–८ का हरि मल्ल र महेन्द्रकुमार श्रेष्ठलाई बुटबल–नारायणगढ सडक खण्डका दायाँबायाँका रुख कटानको सबकन्ट्रयाक आफूले पाएको भन्दै चाइना स्टेट कन्ट्रक्सन इञ्जिनियरिङ कर्पोरेसनसँग अञ्जली कन्स्ट्रक्सन र आफ्नो (रविकुमार सिंह) को साझेदारी भएको नक्कली कागजात देखाएर ४३ लाख ७३ हजार रुपैयाँ ठगी गरेको पाइएको छ ।

एसपी कोइरालाका अनुसार ऊ ४० प्रतिशत मुनाफा दिने भन्दै पैसा नभएको चेक दिएर भागेको थियो ।

ऊ बुटवलको लुम्बिनी सांस्कृतिक नगरपालिका– ६ का अनिल गुरुङसँग आफू अञ्जली कन्स्ट्रक्सनको डाइरेक्टर भएको भन्दै मासिक ९० हजार भाडा दिने भनेर बा १२ च ३८५९ नम्बरको स्वीफ्ट गाडी २०७६ वैशाखमा लिएर फरार भएको थियो । त्यही कारको नक्कली कागजपत्र बनाएर ८ लाख ३५ हजारमा बन्दकी राखेर अर्को ठगी समेत गरेको पाइएको छ ।

त्यस्तै धनुषा जनकपुरधाम उपमहानरपालिकास्थित न्यू साह एण्ड इन्टरप्राइजेजका सञ्चालक प्रदीपकुमार साहलाई आफू रोयल हाइड्रो कन्स्ट्रक्सनको म्यानेजिङ डाइरेक्टर भएको र १ लाख ५० हजार मासिक भाडा दिने भन्दै प्रदेश ३–०१/०२३ च ००५० नम्बरको सुजुकी ब्रेजा गाडी लिएर फरार भएको थियो ।

यति मात्र नभएर उसले रोयल हाइड्रो कन्स्ट्रक्सनको नक्कली लेटरप्याड, छाप, नक्कली दस्तखत प्रयोग गरेर संस्थापक अध्यक्ष भएको भन्दै १ करोड ठगी गरेको महाशाखाका प्रवक्ता कोइरालाले बताए ।

प्रहरीले सिंहलाई ललितपुरको महालक्ष्मी नगरपालिका–५ सेतीपाखाबाट पक्राउ गरेको थियो । 

‘सक्कली कागजात पानीले बिग्रियो म सक्कली कागजात बनाएपछि दिन्छु भनेर ठग्दो रहेछ’ कोइरालाले भने, ‘ऊ जहाँ पुग्यो त्यहीँ ठग्ने भएकाले अझै उजुरीहरू आइरहेका छन् ।’

उसको नक्कली नागरिकता कसरी बन्यो ? वा कसरी कीर्ते भयो ? कसले सहयोग गर्‍यो भन्ने जानकारीका लागि जिल्ला प्रशासन कार्यालयमा पत्र पठाएको र त्यहाँबाट जवाफ आएपछि मात्र थाहा हुने प्रवक्ता कोइरालाले बताए । 

प्रहरीमा हालसम्म आएका उजुरी हेर्दा १ करोड ६५ लाख ९८ हजार रुपैयाँ ठगेको देखिएको छ । उजुरी थपिने क्रम जारी रहेकाले यो रकम अझै बढ्न सक्ने प्रहरीले जनाएको छ ।