एमालेले संसद अवरोध जारी राखेपछि सभामुखले बोलाए सर्वदलीय बैठक

सभामुख अग्नि सापकोटाले सोमवार दिउँसो सर्वदलीय बैठक बोलाएका छन् ।

नेकपा एमालेले लगातार संसद अवरोध गरेपछि त्यसको निकासको लागि सभामुखले सर्वदलीय बैठक बोलाएका हुन् । 

सोमवार दिउँसो साढे २ बजे संसद भवनको ल्होत्से हलमा बस्ने गरी सर्वदलीय बैठक बोलाइएको सभामुखका प्रेस सल्लाहकार श्रीधर न्यौपानेले जानकारी दिए । बैठकमा संसदमा रहेका सबै दलका शीर्ष नेतालाई आमन्त्रण गरिएको उनले बताए ।  

एमालेको कारवाही गरेको भनिएको १४ जना सांसदको पद रिक्त भएको सूचना प्रकाशन नगरेर सभामुखले एमाले विभाजनमा सहयोग गरेको भन्दै एमालेले  त्यसको विरोधमा संसद अवरोध गरिरहेको छ । 

संसदको नवौं अधिवेशन शुरू भए यता एमालेले लगातार संसद अवरोध गर्दै आएको छ ।