सत्तारुढ गठबन्धनबीच मन्त्रालय भागवण्डा गर्दा स्वास्थ्य मन्त्रालय माधव नेपालको पार्टी नेकपा (एकीकृत समाजवादी)को भागमा परेपछि स्वास्थ्य राज्यमन्त्री उमेश श्रेष्ठको पद धरापमा परेको छ । प्रधानमन्त्रीको शपथ लिएको १२ दिनपछि साउन १० गते शेरबहादुर देउवाले उमेश श्रेष्ठलाई स्वास्थ्य राज्यमन्त्रीको शपथ गराएका थिए । स्वास्थ्य राज्यमन्त्री नियुक्त भएलगत्तै श्रेष्ठले कोरोनाविरुद्धको खोपका लागि पहलकदमी तीब्र बनाएका थिए ।

स्वास्थ्य मन्त्रालय माधव नेपालको पार्टीलाई दिन बिहीवार सत्ता गठबन्धनबीच सहमति भएको छ । स्वास्थ्य मन्त्रालय माधव नेपालको पार्टीले पाउँदा कांग्रेसको राज्यमन्त्री नरहने नेकपा एस स्रोतले बतायो । यसअघि केपी ओली सरकारको पालामा स्वास्थ्य मन्त्रालयमा एमालेको मन्त्री छँदा तत्कालीन संघीय समाजवादी पार्टीका राज्यमन्त्री थिए ।  

अहिले कानून मन्त्री रहेका ज्ञानेन्द्र बहादुर कार्कीसँगै राज्यमन्त्री श्रेष्ठको मन्त्रालय फेरबदल हुनसक्ने कांग्रेस स्रोतले जानकारी दियो । कांग्रेसले सम्हाल्ने गृह, रक्षा, परराष्ट्र या सञ्चार मन्त्रालयमा श्रेष्ठ राज्यमन्त्री बन्ने सम्भावना रहेको कांग्रेस स्रोतले बतायो ।

कांग्रेसको भगमा परेका गृह, परराष्ट्र र कानून मन्त्रालयमा मन्त्री नियुक्त भइसकेका छन् । कार्कीलाई सञ्चार मन्त्रालयको जिम्मेवारी दिने तयारी भएको कांग्रेस स्रोतले बतायो ।
रामचन्द्र पौडेल समूहबाट मन्त्री बन्ने दुईजना र कृष्ण सिटौला समूहबाट मन्त्री बन्ने एक जनाले रक्षा, कानून, महिला वालवालिका तथा जेष्ठ नागरिक मन्त्रालय वा युवा तथा खेलकुद मन्त्रालयको जिम्मा पाउने छन् ।
बिहीवार मन्त्रालयको भागवण्डा टुंगिएकाले शुक्रवार मन्त्रिपरिषद्ले पूर्णता पाउने सम्भावना रहेको स्रोतले बतायो । बिहीवार एक कार्यक्रममा प्रचण्डले उस्तै परे आज नै नभए भोलिसम्म मन्त्रिमण्डलले पूर्णता पाउने बताएका थिए ।