डिजिटल भुक्तानी सेवा प्रदायक फोनपे पेमेन्ट सर्विस लिमिटेड र प्रभु टेक्नोलोजीबाट सञ्चालित प्रभुपेबीच सहकार्य भएको छ ।

बुधवार एक कार्यक्रमको आयोजना गर्दै दुई कम्पनीहरूले सहकार्यको घोषणा गरेका हुन् ।

यस सहकार्यसँगै अब प्रभुपे फोनपे नेटवर्कमा आवद्ध भएको छ । 

यससँगै अब प्रभुपेका ग्राहकले फोनपेको क्यूआर मार्फत सहजै रकम भुक्तानी गर्न सक्नेछन् ।

यस किसिमको सहकार्य नेपालको डिजिटल कारोबारमा ठूलो उपलब्धी हुने फोनपेले जनाएको छ ।

कार्यक्रममा फोनपेका नायब प्रमुख कार्यकारी अधिकृत दिवस सापकोटाले कम्पनीले पहिलेदेखि नै अन्तरआबद्धतनाका लागि जोड दिँदै आएको बताए । 

उनले भने,‘हामी सबै कम्पनीको लडाईं भनेको नगद कारोबारसँग हो । प्रभुपेसँगको सहकार्यले क्यासलेस अर्थतन्त्र निर्माण गर्ने हाम्रो समान उद्देश्यमा थप मद्दत पुग्नेछ ।’

यस्तै प्रभुपेका प्रमुख कार्यकारी अधिकृत बिकी शाहीले अहिले डिजिटल कारोबारका लागि सबै किसिमका सहकार्य गरेर अगाडि बढ्नुपर्नेमा जोड दिए । 

फोनपेमा अहिलेसम्म ५ लाख ७० हजारभन्दा बढी मर्चेन्ट रहेको कम्पनीले जनाएको छ ।

यस्तै ६० वटा बैंक तथा वित्तीय संस्था फोनपे नेटवर्कमा आवद्ध रहेको कम्पनीको भनाइ छ ।