काठमाडौं महानगरपालिका-६ बौद्ध प्लाटिङस्थित खाजा घरबाट अनलाइन बिंगो खेलिरहेका १६ जनालाई प्रहरीले पक्राउ गरेको छ । 

कागेश्वरी मनोहरा नगरपालिका-७ शिवचोक बस्ने सिन्धुपाल्चोक भोटेकोशी गाउँपालिका-१ घर भएका २५ वर्षीय पासाङ शेर्पा लगायत १६ जनालाई आइतवार साँझ प्रहरीले पक्राउ गरेको हो । 

उक्त खाजा घरमा अनलाइन बिंगो खेल खेलिरहेको भन्ने सूचनाको आधारमा महानगरीय प्रहरी वृत्त बौद्धबाट खटिएको प्रहरीले उनीहरूलाई नगद ७४ हजार १५० रूपैयाँ सहित पक्राउ गरेको हो ।

साथै प्रहरीले उनीहरूको साथबाट १ हजार ५ सय पिस बिंगो टिकट र २ थान स्पिकरसमेत बरामद गरेको छ ।  

यस सम्बन्धमा प्रहरीले थप अनुसन्धान गरिरहेको जनाएको छ ।