राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले ठूला भ्रष्टाचारमा तीन ठूला दल एकैठाउँमा हुने गरेको आरोप लगाएका छन् । 

रुपन्देहीको भैरहवामा आयोजित पार्टीको सभालाई सोमवार सम्बोधन गर्दै उनले ठूला भ्रष्टाचार गर्दा कांग्रेस, एमाले, माओवादी र तिनका शीर्ष नेताहरू एकै ठाउँ हुने गरेको आरोप लगाएका हुन् । 

‘लामो समय कांग्रेस, एमालेले मुलुकलाई बन्धक बनाए, भएका उद्योगधन्दा पनि बेचेर खाए,’ उनले भने, ‘तपाईं हामीलाई थाहा नै छ, बाहिर फरक पार्टी देखिए पनि ठूला भ्रष्टाचारमा एकै ठाउँ हुने गरेका छन् ।’ 

उनले मुलुकको अर्थतन्त्र गम्भीर संकटमा पर्नु यी ठूला दलहरूकै कारण भएको बताए । 

ठूला दलले देशलाई कमजोर बनाउन, वैदेशिक हस्तक्षेप गराउन, विदेशीहरूसँग मागेर मात्र नेपालको राजनीति र सत्तामा टिक्न सकिन्छ भन्ने संस्कार विकास गराउन लागेको उनको आरोप छ । 

उनले भने, ‘यस्तै अवस्था रहे मुलुक श्रीलंका जस्तो नबन्ला भन्न सकिँदैन ।’ उनले बैंकमा पैसा नहुँदा लगानी खुम्चिएको बताए । 

‘बैंकले पैसा छैन भन्छ, राष्ट्रिय ऋण बढेकोबढ्यै छ । प्रत्येक नागरिकको टाउकोमा ७० हजार ऋण छ । सबै विकास निर्माणका काम रोकिएका छन् । भएका कामको पनि सरकारले भुक्तानी दिन सकेको छैन,’ उनले भने, ‘आज मुलुक यो अवस्थामा आउनुमा को दोषी छ ? अब विचार गरौं ।’

उनले ३१–३२ वर्ष मुलुकमा शासन चलाएका दलहरूले नेपाली जनतालाई सपना र उद्देश्यविहीन बाटोमा डोर्‍याउने काम गरेको जनाए । 

‘हेर्नुस्, अदालत, अदालत जस्तो छैन । संसद्, संसद् जस्तो छैन । सरकार, सरकार जस्तो छैन,’ उनले भने, ‘एउटा सिटामोल चाहियो भने अदालतले देऊ भनेर आदेश दिनुपर्छ ।’ 

अध्यक्ष लिङ्देनले जयसिंह धामी भारतीय सुरक्षाकर्मीका कारण महाकाली नदीमा बेपत्ता हुँदासमेत क्षतिपूर्ति माग गर्न नसक्नु सरकारको निरीहता भएको बताए ।