राष्ट्रिय प्रजातन्त्र पार्टी (राप्रपा)ले जिल्ला प्रशासन कार्यालय पाँचथरमा धर्ना दिएको छ । महँगी र भ्रष्टाचारको विरोधमा राप्रपाले शुक्रवार प्रशासन कार्यालयमा धर्ना दिएको हो ।

राप्रपाको आकाशिँदै गएको मूल्य वृद्धिले जनता मारमा परेको बताएको छ । धर्ना अघि राप्रपाका कार्यकर्ताहरुले फिदिम बजार परिक्रमा गरेका थिए । उनीहरुले भ्रष्टाचारको अन्त्य गर्नुपर्ने, किसानलाई मल र बिउ उपलब्ध गराउनुपर्ने माग गरेका छन् । 

सरकारको उपस्थिति नाममा मात्र सीमित भएको राप्रपाको आरोप छ । ‘सिंहदरबारमा अवस्थित वर्तमान सरकारले जनताको पीर मर्का बुझ्न सकेन,’ राप्रपाका पूर्व केन्द्रीय सदस्य राजकुमार जोशीले भने, ‘चरम मूल्य वृद्धि र भ्रष्टाचारको माध्यमबाट सरकारले जनतालाई सास्ती मात्र दिएको छ । जनतालाई समयमै राहत दिन सरकारसँग जोडदार माग गर्दछौँ ।’ 

सरकारले किसानलाई मल र बिउजस्तो आधारभूत सेवा दिन नसकेको भन्दै राप्रपा पाँचथरका नेता झलक थापाले सरकारको आलोचना गरे । उनले शान्ति सुरक्षा र सुशासनको मागसमेत गरेका छन् ।