सरकारले ल्याएको नागरिकता विधेयक पश्चगामी छ : सांसद झा

लोकतान्त्रिक समाजवादी पार्टी (लोसपा) नेपालका सांसद अनिलकुमार झाले सरकारले ल्याएको नागरिकता विधेयक पश्चगामी भएको टिप्पणी गरेका छन् ।

उनले अंगीकृत नागरिकहरूलाई नागरिकता दिने विषयमा विधेयक पश्चगामी रहेको बताए ।

उनले भने, ‘पहिलेको जुन नागरिकता सम्बन्धी ऐन थियो, त्यसभन्दा यो पश्चगामी हो । त्यसमा भएका विषयवस्तुहरूमध्ये कतिपयलाई यसले समेट्न सकेको छैन तर जसको आमाबुवा दुवै नेपाली नागरिक छन् र सन्तानको नागरिकता थिएन । उसको काम यसले अगाडि बढ्छ भन्ने हामीलाई विश्वास छ तर नेपाल बाहिरकी छोरीहरू जो नेपालमा विवाह गरेर बुहारी बनेर आउँछिन् । उनीहरूको नागरिकताको बारेमा यो विधेयक अहिले पनि पश्चगामी छ र अंगीकृत नागरिकहरूको नागरिकता दिने विषयमा पनि यो विधेयक पहिलेको ऐन, कानूनभन्दा पश्चगामी छ । त्यसैले समग्रमा यो विधेयकले नागरिकता समस्याको सर्वकालिक समाधान र सबै प्रकारले समाधान गर्दैन । आशिंक रूपले भए पनि नागरिकता सम्बन्धी यो विधेयक पास भएपछि समस्या थप समाधान हुन्छ भन्ने कुरा हो ।’

सांसद झाले विधेयकले नागरिकता सम्बन्धी सबै प्रकारको समस्याको समाधान नगर्ने बताए । उनले नागरिकता सम्बन्धी समस्या विधेयक पारित भएपछि आशिंक रूपमा समाधान हुने उल्लेख गरेका छन् ।