उपसभामुख चयनका लागि शुक्रवार प्रतिनिधिसभामा मतदान हुँदैछ । उपसभामुख पदका लागि सत्तारुढ पाँच दलीय गठबन्धनका तर्फबाट नेपाली कांग्रेसकी पुष्पा भुसाल र नेकपा एमालेकी विद्या भट्टराईले उम्मेदवारी दर्ता गराएका छन् । 

उपसभामुख पदमा भुसाल निर्वाचित हुने सम्भावना बलियो छ । यद्यपि, यस निर्वाचनलाई लिएर लोकतान्त्रिक समाजवादी पार्टी (लोसपा) तानातानमा परेको छ । आफ्नो उम्मेदवारको पक्षमा मतदान गर्न गठबन्धनको तर्फबाट प्रधानमन्त्री एवं नेपाली कांग्रेसका सभापति शेरबहादुर देउवा र एमाले अध्यक्ष केपी शर्मा ओलीले औपचारिक रूपमा आग्रह गरेका छन् । 

ओलीले लोसपा अध्यक्ष महन्थ ठाकुरलाई बिहीवार साँझ टेलिफोन गरेर उपसभामुख पदमा आफ्नो पार्टीको उम्मेदवारलाई समर्थन गर्न आग्रह गरेका थिए । उनले विगतमा पनि एमाले र लोसपाबीच सहकार्य भएको स्मरण गराउँदै उनले उपसभामुखको निर्वाचनमार्फत पुनः सहकार्यको वातावरण बनाउन आग्रह गरेको ओलीनिकट स्रोतले जनाएको छ । तत्कालीन ओली नेतृत्वको सरकारलाई समर्थन गर्ने वा नगर्ने विषयमा भएको विवादकै कारण तत्कालीन जनता समाजवादी पार्टी (जसपा)मा रहेका ठाकुर समूहले पार्टी विभाजन गर्दै लोसपा गठन गरेको थियो । 

ओलीपछि प्रधानमन्त्री देउवाले पनि शुक्रवार बिहान ठाकुरसँग उपसभामुख निर्वाचनको विषयमा टेलिफोनमार्फत सम्वाद गरेका छन् । देउवाले पनि ठाकुरलाई निर्वाचनमा समर्थन गर्न आग्रह गरेका थिए । जवाफमा ठाकुरले पार्टीभित्र छलफल गरेर निर्णय लिने बताएका थिए । 

लोसपा सत्ता गठबन्धनमा सहभागी हुन तयारी अवस्थामा बसेको पहिलेदेखि नै हो । तर, हालसम्म सरकारमा सहभागी भइसकेको छैन । लोसपा सरकारमा सहभागी हुने यसअघि पटक–पटक चर्चा भएको थियो । 

लोसपाले बोलायो संसदीय दलको बैठक 

एमालेले उपसभामुखको निर्वाचनमा लोसपासँग गठबन्धन गर्न चाहेको थियो । सोहीअनुसार लोसपाका तर्फबाट उम्मेदवार उठाएर आफूले समर्थन गर्ने एमालेको रणनीति थियो । लोसपाकी चन्दाकुमारी चौधरीलाई उम्मेदवार बनाउने र समर्थन गर्ने विषयमा एमाले र लोसपा नेतृत्वबीच छलफल पनि भएको बताइन्छ । तर, लोसपा आखिरीमा पछाडि हट्यो । लोसपाले उम्मेदवारी दर्ता गराएन । लोसपाले नगरेपछि एमालेले विद्या भट्टराईलाई उम्मेदवार बनाउने निर्णय गरेको थियो । 

लोसपाले उम्मेदवारी दर्ता नगरेर गठबन्धनमा सहभागी हुन चाहेको फेरि पनि संकेत गरेको छ । तर, उपसभामुखको निर्वाचनमा गठबन्धनलाई समर्थन गर्ने औपचारिक निर्णय गरिसकेको छैन । त्यसबारेमा छलफल गर्न लोसपाले संसदीय दलको बैठक बोलाएको छ । 

लोसपाका प्रमुख सचेतक लक्ष्मणलाल कर्णले उपसभामुखको निर्वाचनबारे छलफल गर्न संसदीय दलको बैठक बोलाइएको लोकान्तरलाई जानकारी दिए । उनले हालसम्म कसलाई समर्थन गर्ने भन्ने बारेमा निर्णय भइनसकेको भन्दै बैठकले यसबारेमा निर्णय लिने बताए । ‘संसदीय दलको बैठकमा उपसभामुखमा कसलाई समर्थन गर्ने भन्ने बारेमा छलफल हुन्छ,’ उनले भने, ‘बैठकबाट औपचारिक निर्णय गरेर अघि बढ्छौँ ।’ 

प्रमुख सचेतक कर्णले सत्ता र प्रतिपक्ष दुवैतर्फबाट समर्थनका लागि आग्रह गरिएको बताए । तर, अहिलेसम्म कसलाई समर्थन गर्ने भन्ने बारेमा निर्णय भइनसकेको उनको भनाइ छ । 

लोसपा संसदीय दलको बैठक शुक्रवार दिउँसो २ बजे बोलाइएको छ । उपसभामुखको निर्वाचन प्रक्रिया दिउँसो ३ बजे बस्ने प्रतिनिधिसभाको बैठकमा आरम्भ हुनेछ ।