प्रत्यक्ष निर्वाचितहरू काम छ भन्दै हिँड्ने र समानुपातिक सांसदको काम संसदको बैठक कुर्ने मात्र भएको भन्दै समानुपातिक प्रणाली खारेज गर्न प्रतिनिधि सभामा आवाज उठेको छ । मंगलवार बसेको प्रतिनिधि सभाको बैठकमा नेमकिपा सांसद प्रेम सुवालले आधा संख्या महिला दिने भन्दै प्रतिनिधि सभालाई प्रत्यक्ष बनाउन प्रस्ताव गरेका हुन् ।

‘पटक–पटक गणपुरक संख्या नपुगको हुँदा प्रतिनिधि सभा सबै प्रत्यक्ष निर्वाचित गरौँ । त्यसमा आधा सीट महिलालाई छुट्याऔँ । समानुपातिक खारेज गरिदिऔँ’, सुवालले भने, ‘किनभन्दा समानुपातिक यहाँ बैठक कुर्नुपर्ने प्रत्यक्ष निर्वाचित मेरो निर्वाचन क्षेत्रको काम छ भन्दै जानुपर्ने भन्ने आएकोले समानुपातिक खारेज गर्न सरकारको ध्यानाकर्षण गराउँछु ।’ 

सुवालले गणपूरक संख्या यकिन गर्न माग गरेपछि पछिल्ला दिनमा प्रतिनिधि सभाका बैठक स्थगित हुँदै आएका छन् । समानुपातिक प्रणाली खारेज गर्न संसदबाहिर पनि आवाज उठ्ने गरेको छ ।