जनता समाजवादी पार्टी, नेपालका अध्यक्ष एवं पूर्वउपप्रधानमन्त्री उपेन्द्र यादवले संसद्ले दोहोर्‍याएर पारित गरेको नागरिकतासम्बन्धी विधेयकलाई राष्ट्रपतिले प्रमाणीकरण गर्नुको विकल्प नरहेको बताएका छन् । संघीय संसद्को दुवै सदनले पुनः पारित गरेर पठाएको नागरिकता विधेयकले स्वतः ऐनको रूप लिने उनले दाबी गरे । 

अध्यक्ष यादवले सो विधेयकलाई राष्ट्रपति विद्यादेवी भण्डारीले रोक्नु नमिल्ने तर्क गरेका छन् । शनिवार प्रतिनिधिसभा बैठकमा बोल्दै उनले विधेयक राष्ट्रपतिबाट प्रमाणीकरण नभए संघीय लोकतान्त्रिक गणतन्त्र नै धरापमा पर्ने चेतावनी दिए । 

‘कुनै पनि पार्लियामेन्टले दोहोर्‍याएर पारित गरेपछि त्यो स्वत: ऐनको रूपमा लिन्छ । यसले संसदीय मर्यादाकै खिल्ली उडेको छ । संसदले पारित गरिसकेपछि तिनलाई प्रमाणीकरणबाट रोक्न मिल्दैन’, उनले भने, ‘यदि त्यसो गर्ने हो भने संसदले पारित गर्दै जाने, तर त्यो प्रमाणीकरण नहुने हो भने के हाल हुन्छ, लोकतन्त्रको, संघीय व्यवस्थाको ? त्यसकारणले म भन्छु–संघीय व्यवस्था, संसदीय लोकतन्त्र, संघीय लोकतान्त्रिक गणतन्त्रनै खतरामा पर्न गएको छ । धरापमा पर्न जाँदैछ । यसका संकेतहरु देखिएका छन । यसप्रति सचेत रहन जरुरी छ ।’