एमालेले तय गर्‍यो प्रदेश सभा र प्रतिनिधि सभाका ३३० जना समानुपातिक उम्मेदवार, यस्तो छ प्रदेशगत उम्मेदवारको विवरण

नेकपा एमालेले आगामी मंसिर ४ गते हुने प्रतिनिधिसभा  र प्रदेशसभा निर्वाचनका लागि समानुपातिकतर्फको नामावली प्रस्ताव पारित गरेको छ । 

आइतवार एमाले अध्यक्ष केपी शर्मा ओलीको बालकोटस्थित निवासमा बसेको सचिवालय बैठकले समानुपातिकतर्फका उम्मेदवारको सूची पारित गरेको हो ।

संवैधानिक प्रावधानबमोजिम सबै क्लस्टर समेटेर प्रतिनिधिसभाका लागि ११० जना र प्रदेशसभाका लागि २२० जनाको नाम छनोट भएको एमाले प्रचार विभागका उपप्रमुख पृथ्वीसुब्बा गुरुङले जानकारी दिए ।

प्रतिनिधि सभाका लागि छानिएका ११० जनामध्ये ५७ जना महिला समेटिएको गुरुङले जानकारी दिए । 

सचिवालयबाट पारित भएको सूची सोमवार निर्वाचन आयोगमा बुझाउने गुरूङले बताए । 

समानुपातिकतर्फको उम्मेदवारको सूची बुझाउने सोमवार अन्तिम दिन हो ।

प्रचार विभागका सचिव गगन विष्टले आइतवार प्रकाशन गरेको विज्ञप्तिअनुसार, प्रतिनिधिसभातर्फ ११० जनाको नाम प्रस्ताव हुँदा आदिवासीतर्फ ३२, खस आर्यतर्फ ३४ (आधा महिला आधा पुरुष, थारु ७, दलित १५, (८ महिला र ७ पुरुष), मधेशीतर्फ १७, (९ महिला, ८ पुरुष), मुस्लिमतर्फ ५ (३ महिला, २ पुलिस) जम्मा महिला ५७ गरी ११० जना छनोट गरेको उल्लेख छ ।

त्यसैगरी, प्रदेश नम्बर १ का लागि २० महिला र १७ जना पुरुषसहित ३७ को नाम समावेश गरिएको छ । 

त्यसैगरी, मधेस प्रदेशमा २३ महिला र २० पुरुष गरी ४३ को सूची तयार भएको छ । बागमती प्रदेशमा २० पुरुष र २४ महिलासहित ४४ जनाको सूची बनेको विज्ञप्तिमा उल्लेख छ ।

गण्डकीको समानुपातिक सूचीमा ११ जना पुरुष र १३ जना महिला गरी २४ उम्मेदवारको सूची तयार भएको छ । 

गण्डकी प्रदशेमा आदिवासीतर्फ ११ जना जसमा ६ महिला ५ पुरुष, खस आर्यतर्फ नौ जनामा ५ महिला ४ पुरुष, दलिततर्फ ४ मा दुई महिला र दुई पुरुष रहेको एमालेले प्रकाशन गरेको विज्ञप्तिमा उल्लेख छ ।

लुम्बिनी प्रदेशमा १५ जना पुरुष र २० जना महिला गरी ३५ जना उम्मेदवारको नाम बन्द सूचीमा समावेश भएको छ । त्यहाँ, आदिवासी जनजाति ७, खस आर्यतर्फ १७, थारूतर्फ ५, मधेसी ५ र मुस्लिम ३ जना सिफारिस गरेको छ । कर्णालीमा आदिवासीको १ महिला, खस आर्य १०, दलित ४ जना रहेको विज्ञप्तिमा उल्लेख छ । 

कर्णाली प्रदेशमा १० पुरुष र ११ महिला गरी २१ जना समानुपातिक उम्मेदवारको सूची बनेको छ । आदिवासी जनजातिमा महिला र पुरुष गरेर २ जना, खसआर्यमा ५ पुरुष र ५ महिला गरेर १० जना, दलितमा २ पुरुष र २ महिला गरेर ४ जनाको नाम बन्द सूचीमा समावेश भएको छ । 

सुदूरपश्चिम प्रदेशका लागि १० पुरुष र ११ महिला गरेर २१ जनाको नाम बन्द सूचीमा समेटिएको छ । जसमा आदिवासी जनजाति १, खस आर्यमा ६ पुरुष र ६ महिला गरी १२, थारुमा २ महिला र २ पुरुष गरी ४, दलितमा  २ महिला र २ पुरुष गरी ४ जनाको नाम बन्द सूचीमा समावेश भएको एमालेको विज्ञप्तिमा उल्लेख छ ।