राष्ट्रपति विद्यादेवी भण्डारीले नागरिकता विधेयक प्रमाणीकरण नगरेको विषयमा सत्तारूढ गठबन्धनमा रहेका दलहरूले साझा वक्तव्य जारी गर्ने तयारी गरेका छन् । 

प्रधानमन्त्री निवास बालुवाटारमा बुधबार बसेको गठबन्धनको शीर्ष नेताहरूको बैठकले नागरिकता विधेयकप्रति राष्ट्रपतिको भूमिकाबारे साझा वक्तव्य जारी गर्ने तयारी भएको नेपाली कांग्रेसका नेता रामहरी खतिवडाले जानकारी दिए । 

संसदले दोस्रो पटक प्रमाणीकरणको लागि पठाएको विधेयक राष्ट्रपति विद्यादेवी भण्डारीले प्रमाणीकरण नगरी यत्तिकै राखिदिएकी छन् । 

संविधानको धारा ११३ को उपधारा ४ अनुसार दोस्रो पटक प्राप्त भएको विधेयक १५ दिन भित्रमा प्रमाणीकरण गर्नुपर्ने बाध्यकारी व्यवस्था छ । विधेयक राष्ट्रपति समक्ष पेश भएको मंगलबार नै १५ दिन पुगेको थियो ।

पहिलो पटक प्रमाणीकरणको लागि आएको विधेयक राष्ट्रपति भण्डारीले १५ बुँदे सन्देशसहित संसदमा फिर्ता गरेकी थिइन् ।

तर, संसदले भने राष्ट्रपतिको सुझावलाई वेवास्ता गरेर जस्ताको तस्तै विधेयक पारित गरेर प्रमाणीकरणको लागि पठाएको थियो ।