नेपाली कांग्रेसका नेता डा.शेखर कोइराला पक्षका युवा नेताहरूले पार्टी कार्यालय सानेपामा बुधवार धर्ना दिएका छन् । ‘पार्टीभित्र न्याय र अवसरका लागि’ भन्दै संघर्ष गरिरहेका नेताहरूले धर्ना दिएका हुन् । 

धर्नामा युवा नेता गुरुराज घिमिरे, कांग्रेस नुवाकोटका पूर्वसभापति जगदीश्वर नरसिंह केसीलगायतका नेताहरूले धर्ना कार्यक्रमको नेतृत्व गरिरहेका छन् । निर्वाचन आयोगमा कांग्रेसले पेश गरेको समानुपातिक उम्मेदवारहरूको बन्दसूची सच्याउनुपर्ने, प्रत्यक्षतर्फ टिकट वितरण गर्दा आफ्नो समूहलाई ४० प्रतिशतको हिस्सा दिनुपर्ने उनीहरूको माग छ । आयोगले समानुपातिकतर्फको बन्दसूची सच्याउने राष्ट्रिय दललाई बिहीवारसम्मको समय दिएको छ । 

शेखर पक्षले सभापति शेरबहादुर देउवाले एकलौटी ढंगले समानुपातिक उम्मेदवारको बन्दसूची बुझाएको आरोप लगाउँदै आएको छ । शेखर समूहले निर्वाचन आयोगमा छुट्टै समानुपातिक उम्मेदवारको सूचीसमेत बुझाएको थियो । यद्यपि, आयोगले त्यसलाई मान्यता दिनेछैन । 

शेखर पक्षले सभापति देउवाले गठबन्धनमा सिट बाँडफाँट गर्दा आफूपक्षीय नेताहरूको क्षेत्र अन्य दललाई छाडेको आरोप लगाइरहेको छ । शेखर पक्षले गठबन्धनका अन्य नेताहरूलाई पहिले कांग्रेसभित्रको विवाद समाधान गरेर मात्र सिटको भागबण्डा टुंग्याउन चेतावनी दिइरहेका छन् । 

उनीहरूले यसअघि काठमाडौंमा खबरदारी सभासमेत गरेका थिए । सभामार्फत उनीहरूले बालुवाटारमा सिट बाँडफाँटबारे सहमति हुँदैमा चुनाव जित्ने सपना नदेख्न देउवासहित गठबन्धन दलका नेताहरूलाई चेतावनी दिएका थिए ।