मंसिर ४ गते हुने प्रतिनिधिसभा निर्वाचनमा नेकपा एमाले र राप्रपाले कतिपय जिल्लामा तालमेल गर्ने भएका छन् ।

देशव्यापी नभए पनि केही जिल्लामा तालमेल गर्ने गरी २ दलबीच शुक्रवारै सहमति गर्ने तयारी छ । 

सिट बाँडफाँटका लागि एमाले र राप्रपबीच शुक्रवार निर्णायक वार्ता हुँदैछ । राप्रपा प्रवक्ता मोहन श्रेष्ठले दिउँसो केपी ओलीको निवास बालकोटमा एमाले र राप्रपाको वार्ताको समय तय भएको जानकारी दिए । 

एमालेबाट अध्यक्ष केपी ओली, महासचिव शंकर पोखरेल लगायतका नेताहरू सहभागी हुँदैछन् । 

राप्रपाको तर्फबाट अध्यक्ष राजेन्द्र लिङ्देन, उपाध्यक्ष बुद्धिमान तामाङ लगायतका नेताहरू सहभागी हुँदैछन् । 

राप्रपा नेताहरूका अनुसार झापा, काठमाडौं, चितवन, रुपन्देही, बाँके लगायतका जिल्लामा तालमेल हुँदैछ । झापा–३ मा अध्यक्ष लिङ्देन, काठमाडौं–१ मा रवीन्द्र मिश्र, चितवनमा विक्रम पाण्डे, रुपन्देहीमा दीपक बोहोरा र बाँकेमा डा. धवल शमशेर जबरालाई सहयोग गर्ने गरी चुनावी तालमेलको प्रयास भइरहेको छ । 

एमालेसँग कति ठाउँमा चुनावी तालमेल गर्ने भन्नेबारे शुक्रवार टुंगो लाग्ने राप्रपा प्रवक्ता श्रेष्ठले लोकान्तरलाई बताए । मंसिर ४ गते हुने चुनावका लागि असोज २३ गते आइतवार उम्मेदवार मनोनयनको कार्यक्रम छ ।

मनोनयनका लागि २ दिनको समय बाँकी रहेको समयमा दलहरूले छलफललाई तीव्र बनाएका छन् ।