भारतको राजधानी नयाँदिल्लीबाट उदाएको मुख्यमन्त्री अरविन्द केजरीवाल नेतृत्वको आम आदमी पार्टी (आप) अन्य प्रदेशमा समेत फैलिँदै गइरहेको थियो । हालै आपले भारतको पञ्जाबमा सरकार बनाएको छ ।

पञ्जाबपछि गुजरात प्रदेशमा पनि आपले सरकार बनाउने अपेक्षा गरेको थियो । गुजरातको चुनावी मिसनमा नेता केजरीवाल खुब खटिएका थिए । तर यो मिसनमा उनी ‘फेल’ भएका छन् ।

आपले आफूलाई मुख्य प्रतिस्पर्धीका रूपमा प्रस्तुत गर्ने गरे पनि मतगणनाको रुझानमा आप भारतीय कांग्रेसभन्दा पछाडि परेको छ ।

हालसम्मको मतगणनाअनुसार गुजरातका १८२ सिटमध्ये भारतीय जनता पार्टी (भाजपा) १५४, कांग्रेस १९ र आप ६ स्थानमा अगाडि छन् ।

भारतीय सञ्चारमाध्यमका अनुसार भाजपा यसपालि गुजरातमा झन् लोकप्रिय भएर आएको छ । गुजरातको राजनीतिबाटै उदाएका प्रधानमन्त्री नरेन्द्र मोदी देशमाथि शासन गरिरहेका छन् । चुनावी प्रचारमा आपले जबरजस्त प्रस्तुती दिन थालेपछि गुजरातको चुनावमा मोदी स्वयं पनि खटिएका थिए । मोदीको खटाइ नतिजामा परिणत भएको छ भने केजरीवालको मिसन फेल भएको छ ।

गुजरातको ६२ सालको राजनीतिक इतिहासमा यतिधेरै लोकप्रियता भाजपालाई कहिल्यै नमिलेको भारतीय सञ्चारमाध्यमले जनाएका छन् ।