नेपाल मजदुर किसान पार्टी (नेमकिपा) ले प्रतिनिधि सभामा प्रमुख प्रतिपक्षी दलको नेतृत्व दाबी गरेको छ । 

प्रधानमन्त्रीलाई विश्वासको मत दिएको दल नेपाली कांग्रेस प्रमुख प्रतिपक्षी दल हुनै नसक्ने नेमकिपाको भनाई छ ।

बिहीवार बसेको प्रतिनिधिसभा बैठकमा नेमकिपा सांसद प्रेम सुवालले संघीय संसदका पदाधिकारीको सेवासुविधा सम्बन्धी ऐनको दफा उदृत गर्दै कांग्रेसले प्रतिपक्षी दलको हैसियत गुमाएको बताएका हुन् ।

संविधानविद् र विश्लेषकहरूले समेत नेमकिपा नै संसदको प्रमुख प्रतिपक्षी दल रहेको बताएकाले त्यसलाई मान्यता दिन सभामुखसँग माग गरे ।  

प्रतिनिधिसभा बैठकमै नेकपा एमालेका अध्यक्ष केपी शर्मा ओलीले कांग्रेस सरकारको सहयोगी दल भएको बताएको तथा माघ ३ गते बालुवाटारमा सत्ता समर्थित दलको बैठकमा सहभागी भएकाले कांग्रेसले प्रमुख प्रतिपक्षी दाबी गर्न नपाउने उनले जिकिर गरेका छन् ।