पूर्वराजा ज्ञानेन्द्र शाहले प्रजातन्त्र दिवसको नाममा ‘श्री ५ महाराजधिराज’को नाममा वक्तव्य जारी गरेको सम्बन्धमा नेकपा एसका सांसदले प्रधानमन्त्रीको जवाफ माग गरेका छन् ।

पूर्वराजाले संविधान र गणतन्त्रलाई चुनौती दिन खोजेको भन्दै सबै राजनीतिक दल एक हुनुपर्ने बताए । 

बुधवार बसेको प्रतिनिधि सभा बैठकको विशेष समयमा नेकपा एसका सांसद प्रकाश ज्वालाले चिहान उधिनेर राजतन्त्र ब्युँताउने षडयन्त्र नगर्न पूर्वराजालाई चेतावनी दिएका हुन् ।

‘संविधान र गणतन्त्रलाई चुनौती दिने किसिमले पूर्वराजाको वक्तव्यबाजी भएको छ, यसप्रति घोर आपत्ति जनाउँछु’, उनले भने, ‘संसददेखि संसदबाहिर गणतन्त्रको विरुद्धमा धार्मिक सद्भाव, साप्रदायिक एकताविरुद्ध आइरहेका छन्, जुन क्रियाकलाप बन्द गरिनुपर्छ ।’

सांसद ज्वालाले संविधान र गणतन्त्रविरुद्ध आइरहेका वक्तव्यविरुद्ध प्रधानमन्त्रीको जवाफ माग गरे ।

‘सभामुखमार्फत सरकारलाई अनुरोध गर्नै चाहन्छु कहा छ राजतन्त्र ? को छ श्री ५ महाराजधिराज ? सरकारले यस विषयामा संसदलाई जवाफ दिनुपर्छ’, ज्वालाले भने ।

पूर्वराजा ज्ञानेन्द्रले फागुन ७ गते वक्तव्य जारी गर्दै राष्ट्रिय एकताका लागि आग्रह गरेका थिए । जसपाकी सुशीला श्रेष्ठले पनि पूर्वराजाको अभिव्यक्तिप्रति आपत्ति जनाएकी थिइन् ।