राष्ट्रपतिको उम्मेदवार बन्न नेकपा एमालेका अध्यक्ष केपी शर्मा ओलीले गरेको प्रस्तावलाई लिएर नेकपा एकीकृत समाजवादीका अध्यक्ष माधव नेपाल गम्भीर बनेका छन् ।

ओलीको प्रस्तावसँगै नेपालले आफूमा सहमति गर्न प्रयास शुरू गरेका छन् । 

राष्ट्रपतिमा राष्ट्रिय सहमतिको कुरा गरेको माओवादीलाई समेत मान्य हुने भन्दै ओलीले नेपालको नाम प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग प्रस्ताव गरेका थिए । राष्ट्रपतिमा ओलीले आफ्नो नाम प्रस्ताव गरेपछि माधव नेपालले कांग्रेससँग समेत छलफल गरेका थिए । 

‘ओली कमरेडबाट आएको प्रस्तावलाई हामीले गम्भीर रूपमा लिएर छलफल गरिरहेका छौं, उहाँका रणनीति जेसुकै भए पनि राष्ट्रपति पदका लागि माधव नेपाल उपयुक्त पात्र हो भनेर दलहरूसँग संवाद गरेका छौं,’ नेपालका एक विश्वासपात्रले बिहीवार लोकान्तरसँग भने । कांग्रेस नेताहरूसँगको भेटमा नेपालले आफूलाई समर्थन गर्न आग्रह गरेका थिए ।

चुनावअघि गठन भएको ५ दलीय गठबन्धनका अन्य दल सरकारमा सामेल भए पनि नेकपा एस र जनमोर्चा कांग्रेसको सम्पर्कका छन् । आफ्नो पार्टीले राष्ट्रपति पाउने सम्भावना बढेको भन्दै कांग्रेसले बुधवार माधव नेपाललाई कुनै आश्वासन भने दिएन । 

प्रचण्डलाई धर्मसंकट 

ओलीले माधव नेपालको नाम प्रस्ताव गरेपछि प्रचण्ड धर्मसंकटमा परेका छन् । माओवादीले ओलीको ‘एसम्यान’लाई राष्ट्रपति नमान्ने भनेपछि सरकार पनि नढल्ने र माओवादीलाई पनि स्वीकार्य हुने भन्दै माधव नेपालको नाम अगाडि सारेका थिए । 

माधव नेपाललाई राष्ट्रपति बनाउन ओलीले गरेको प्रस्तावबारे प्रचण्डले हुन्छ वा हुन्न केही भनेका छैनन् । माओवादीका महासचिव देव गुरुङले राष्ट्रपतिमा राष्ट्रिय सहमति कायम गरेर जानुपर्ने पार्टीको लाइन यथावत रहेको बताए ।

उनले माधव नेपाललाई ओलीले राष्ट्रपतिको उम्मेदवार बनाउन प्रस्ताव गरेको कुरा आफूहरूलाई त्यति गम्भीर नलागेको बताए । ‘उहाँ (ओली)ले भेटेजतिका सबैलाई राष्ट्रपतिको उम्मेदवार भन्दै हिँड्नुभएको छ । माधव नेपाल, बाबुराम भट्टराई, झलनाथ खनाल सबैलाई आश्वासन दिनुभएको रहेछ,’ गुरुङले लोकान्तरसँग भने, ‘माधव नेपाललाई राष्ट्रपतिको उम्मेदवार बनाउने कुरा नै भरपर्दो छैन, हामीले कसरी समर्थन गर्ने ?’

प्रचण्डसँग कुरा गरे पनि कुनै सिग्नल प्राप्त नभएको नेकपा एसका नेताहरू बताउँछन् । विगतमा नेकपाकालमा माधव नेपाल र प्रचण्ड एकै ठाउँमा उभिएका थिए । 

माओवादी महासचिव गुरुङले शान्ति प्रक्रिया टुंग्याउने मामिलाका कांग्रेससँग नजिक रहेको बताए । फागुन २५ गते हुने राष्ट्रपति निर्वाचनका लागि आगामी १३ गते शनिवार उम्मेदवार मनोनयनको कार्यसूची छ । मनोनयनको मिति नजिकिँदा दलहरूको छलफलले तीब्रता पाएको छ ।