नेकपा माओवादी केन्द्र कोशी प्रदेश संसदीय दलको बैठक अनिर्णित बनेको छ । 

सरकारबाट बाहिरिने वा नबाहिरिने भन्ने विषयमा माओवादी केन्द्र कोशी प्रदेश संसदीय दलको बैठकमा मतभेद भएपछि बैठक अनिर्णित बनेको हो । 

सरकारलाई दिएको समर्थन फिर्ता गर्न भनेर आकस्मिक बैठक बोलाइए पनि बजेट नल्याएसम्म सरकार छाड्न नहुने अडान केही सांसदले राखेका कारण सोमवारै निर्णय हुन नसकेको बैठकमा सहभागी एक प्रदेश सांसदले बताए । 

मंगलवार प्रदेशका नेताहरूसँग आवश्यक छलफल गरेर मात्रै निर्णय गर्ने गरी बैठक सकिएको प्रदेशसभा सदस्य गणेश उप्रेतीले बताए । 

सरकार छाड्ने वा नछाड्ने निर्णय गर्न बसेको बैठक विना निष्कर्ष टुंगिए पनि माओवादीले दलका नेता ईन्द्रबहादुर आङ्बोको नेतृत्वमा वैकल्पिक सरकार निर्माणका लागि पहल समिति गठन गरेको छ । समितिले नयाँ सरकार गठनबारे अन्य दलहरूसँग छलफल गर्नेछ । यसअघि जसपा सरकारबाट बाहिरिसकेको छ ।

नेकपा एमाले, नेकपा माओवादी केन्द्र, राप्रपा र जसपाको गरी ५९ सांसदको समर्थनमा हिक्मत कार्की गत पुस २४ गते मुख्यमन्त्रीमा नियुक्त भएका थिए । माओवादीका १२ र जसपाका १ सांसदले समर्थन फिर्ता लिए कार्की नेतृत्वको सरकार स्पष्ट अल्पमतका पर्नेछ ।

माओवादी केन्द्रबाट कार्की नेतृत्वको सरकारमा भौतिक पूर्वाधार मन्त्री दुर्गाप्रसाद चापागाईं र पर्यटन, वन तथा वातावरण मन्त्री जीवन आचार्य सहभागी छन् । उनीहरू गत माघ ६ गते मन्त्री पदमा नियुक्त भएका थिए ।

नेपाली कांग्रेस कोशी प्रदेश संसदीय दलको गत जेठ ४ गते बसेको बैठकले केन्द्रीय सत्ता गठबन्धनमा रहेका दलहरू माओवादी र जसपाले कोशी प्रदेश सरकारबाट फिर्ता आउन आग्रह गरेको थियो ।