दक्षिण अफ्रिकाविरुद्ध पहिले ब्याटिङ गर्दै भारत

आईसीसी टी–२० क्रिकेट विश्वकपअन्तर्गत दक्षिण अफ्रिकाविरुद्धको फाइनल खेलमा भारतले टस जितेर पहिले ब्याटिङ गर्ने निर्णय गरेको छ ।

बार्बाडोसको किङ्सटन ओभलमा भारतका कप्तान रोहित शर्माले टस जितेर ब्याटिङ गर्ने निर्णय गरेका हुन् ।

दुई देशबीचको फाइनल भिडन्त नेपाली समयअनुसार आज (शनिवार) राति सवा ८ बजे शुरू हुनेछ । 

दक्षिण अफ्रिका पहिलोपटक फाइनल पुगेको हो । उ आज भारतलाई हराएर पहिलो उपाधि जित्दै इतिहास रच्ने सुरमा हुनेछ ।

यता भारतले तेस्रोपटक उपाधि भिडन्त गर्न लागेको हो । 

भारतले डिफेन्डिङ च्याम्पियन इंग्ल्यान्ड र दक्षिण अफ्रिकाले अफगानिस्तानलाई हराएर फाइनलमा स्थान पक्का गरेका हुन् । 

भारतले सन् २०१३ पछि आईसीसी ट्रफी जित्न सकेको छैन । २००७ मा भारतले टी–२० विश्वकपको उपाधि जितेको थियो । यसर्थ उ आज टी–२० विश्वकपको दोस्रो उपाधि जित्ने दाउमा हुनेछ ।   

दक्षिण अफ्रिका हालसम्म फाइनल पुग्न सकेको थिएन । टेस्ट, एकदिवसीय र टी–२० विश्वकपमा दक्षिण अफ्रिका उपाधि नजिक पुगेको यो पहिलोपटक हो ।