समाजवादी पार्टीका संघीय परिषद् अध्यक्ष एवं पूर्वप्रधानमन्त्री डा. बाबुराम भट्टराईले पत्नी हिसिला यमीलाई राष्ट्रिय सभा सदस्य बनाउन खोजेको भन्ने समचारको खण्डन गरेका छन् ।

सामाजिक सञ्जाल ट्विटरमार्फत भट्टराईले यस आसयका समाचारहरूको खण्डन गर्दै अपत्ति जनाएका हुन् । ‘बाबुराम पत्नी हिसिला यमीलाई राष्ट्रिय सभामा लान खोजेको भन्ने शतप्रतिसत झूटको खेती गर्नु घोर आपत्तिजनक छ,' भट्टराईले ट्विटरमा लेखेका छन् ।

साथै उनले हिसिला आफ्नै बुतामा राजनीति गर्ने महिला भएको भन्दै पतिको नामबाट चिनाउन नपर्ने जिकिर पनि गरेका छन् ।

'हिसिला यमी नेपालमा आफ्नै बुतामा राजनीति गर्ने र संविधान सभाको प्रत्यक्ष निर्वाचन जित्ने थोरै महिलामध्ये पर्छिन् । उनको आफ्नै क्रान्तिकारी इतिहास र परिचय छ; पतिको नाउँबाट चिनाउन पर्दैन,' भट्टराईले लेखेका छन्, 'उनलाई चोरबाटोबाट राष्ट्रिय सभामा लाने न हाम्रो पार्टीको कुनै सोच छ, न उनको कहिल्यै रूचि छ, न यसबारे कसैसँग कुनै कुरा भएको छ ! यसरी महिला हिंसा नहोस् !'

निर्वाचनमा नेकपासँग तालमेल गरेर समाजवादी पार्टीले हिसिलालाई राष्ट्रिय सभामा लैजान खोजेको भन्ने चर्चा भएको थियो ।

यद्यपि नेकपाले राष्ट्रिय सभा निर्वाचनका लागि राष्ट्रिय जनता पार्टी 'राजपा'सँग सहकार्य गर्ने सहमति गरिसकेको छ ।