इराक युद्धको जस्तै गरी चीनविरुद्ध भिडन्तको पृष्ठभूमि तयार गर्दै अमेरिका

अमेरिकाका राष्ट्पति जो बाइडनले चीनको वुहानस्थित प्रयोगशालाबाट कोरोनाभाइरस चुहिएर महामारी फैलिएको हो कि हैन भन्ने विषयमा तीन महिनाभित्र अनुसन्धान गर्न अमेरिकी गुप्तचर निकायहरूलाई निर्देशन दिएका छन् । 

इराक युद्ध शुरू गर्नुअघि अमेरिकाले यसैगरी इराकमा आमविनाशकारी हतियार छ कि छैन भन्ने विषयमा अनुसन्धान गराएको थियो । 

त्यतिखेर अमेरिकाको प्रभावशाली दैनिक पत्रिका द वाल स्ट्रीट जर्नलका रक्षा संवाददाता माइकल आर गोर्डनले इरानमा आमविनाशकारी हतियारको भण्डार छ भन्ने झूटो खबर दिएर अमेरिकी आक्रमणलाई जायज ठहर गरेका थिए । द न्युयोर्क टाइम्स जस्ता पत्रिकाले पनि यस्तै किसिमको खबर दिएर तत्कालीन बुश प्रशासनको युद्धपिपासा शान्त बनाएका थिए । 

पछि गएर इराकमा त्यस्तो कुनै पनि हतियार नरहेको पुष्टि भयो ।

अहिले आएर तिनै गोर्डनले वुहान इन्स्टिच्युट अफ भाइरोलोजीबाट कोभिड–१९ भाइरस फुत्केको आरोप लगाउँदै अमेरिकाले चलाएको दुष्प्रचारलाई पत्रिकामा स्थान दिइरहेका छन् । 

महाशक्ति प्रतिस्पर्धामा चीनभन्दा आर्थिक तथा प्राविधिक रूपका पछि परेकोमा चिन्ता बढेपछि अमेरिकाले चीनलाई कलंकित गर्ने र एक्ल्याउने प्रयास थालेको हो । त्यसका लागि कोभिड–१९ को उत्पत्तिको अनुसन्धान गर्ने नाममा वुहान इन्स्टिच्युटलाई तारो बनाइएको हो । 

कोभिड उत्पत्तिको विषय वैज्ञानिक समस्या हो र यसमा गुप्तचर निकायलाई उपयोग गरेर अमेरिकाले गलत बाटो चयन गरेको छ । यसलाई राजनीतिक अभीष्ट पूरा गर्नका लागि भन्दा पनि वैज्ञानिक आधार लिएर हल गर्नु उपयुक्त हुन्थ्यो । 

विश्व स्वास्थ्य संगठनका डा माइक रायनले पनि गुप्तचर संस्थालाई यस विषयमा संलग्न गराउनु अनुपयुक्त भएको प्रतिक्रिया दिएका छन् ।