प्रधानमन्त्री शेरबहादुर देउवाले वैशाख ३० गतेको चुनाव सार्न नेकपाले गरेको आग्रह अस्वीकार गरेका छन् । वैशाख ३० गतेको चुनावको लागि तयारी धेरै अगाडि बढिसकेको भन्दै देउवाले चुनाव सार्न नसकिने बताएका हुन् । 

चुनावमा सहभागी हुने वातावरण बनाइदिन भन्दै प्रधानमन्त्री निवास बालुवाटार गएका नेकपा महासचिव नेत्रविक्रम चन्द विप्लवलाई बुधवार देउवाले चुनाव सार्न नसकिने बताएका हुन् । देउवाले स्वतन्त्र ढंगले चुनावमा सहभागी हुन सुझाव दिएको स्रोतले जानकारी दियो । 

विप्लवको मागबारे बुधवार मन्त्रिपरिषद् बैठकमा समेत छलफल भएको थियो । केपी ओली सरकारसँग भएको तीन बुँदे सहमतिअनुसार राजनीतिक मुद्दा लागेका कार्यकर्तालाई प्रक्रिया पुर्‍याएर छाड्न सकिने भए पनि चुनाव सार्ने प्रस्तावमा सहमति जनाउन नसकिने देउवाले जवाफ दिएका थिए । 

सत्ता गठबन्धनको एक दल नेकपा एसका अध्यक्ष माधव नेपालले विप्लवको पार्टीलाई सहभागी गराउन चुनाव सार्न सकिने आशयको अभिव्यक्ति दिएका थिए । विप्लवलाई देखाएर गठबन्धनले चुनाव सार्ने षड्यन्त्र गरेको भन्दै एमालेले विरोध जनाउँदै आएको छ । मंगलवार एमाले अध्यक्ष केपी ओलीले विप्लवलाई देखाएर वैशाखको चुनाव सार्ने षड्यन्त्र भए मान्य नहुने बताएका थिए । 

प्रधानमन्त्री देउवाले वैशाख ३० को चुनाव कुनै पनि हालतमा नसर्ने प्रतिबद्धता जनाएको सरकारका एक मन्त्रीले लोकान्तरलाई जानकारी दिएका थिए । चुनावमा सहभागी हुने/नहुने भन्ने विषयमा विप्लवको पार्टीभित्र विवाद चर्किएको छ । 

विप्लव, खड्गबहादुर विक प्रकाण्डलगायत नेताहरु चुनावमा सहभागी हुने पक्षमा देखिएका छन् भने हेमन्तप्रकाश ओली, धर्मेन्द्र बास्तोलालगायतका नेताहरू भने चुनाव बहिस्कार गरेर जानुपर्ने अडानमा छन् ।