नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले सचिवालय सदस्य हेमन्तप्रकाश ओली ‘सुुदर्शन’ र धर्मेन्द्र वास्तोला ‘कञ्चन’ लाइ पदमुक्त गरेको छ । 

बुधवार बिहान कपिलवस्तुको शिवगढीमा बसेको सचिवालय बैठकले उनीहरूलाई जिम्मेवारीबाट पदमुक्त गरेको हो । 

‘सबैतिरका सुझाव एवं सुदर्शन र कञ्चनका गल्तीहरूको प्रकृति हेर्दा उहाँहरू निकै पर पुगिसकेको, विभिन्न बैठक एवं भेलासमेत गर्दै हिँडेकाले पार्टी विधानअनुसार दुवैजनालाई अनिश्चित समयका लागि सम्पूर्ण जिम्मेवारी मुक्त गरिएको जानकारी गराइन्छ,’ विप्लवले जारी गरेको वक्तव्यमा उल्लेख छ । 

सुदर्शन र कञ्चनले स्थानीय चुनावमा जान नहुने बताएका थिए । साथै उम्मेदवारी दिएकाहरूलाई कारबाही गर्ने भनेर वक्तव्य निकालेका थिए ।