नेपाल विद्युत प्राधिकरणले काठमाडौं उपत्यका भित्रका ग्राहकहरूका लागि छुट्टै कल सेन्टर सञ्चालनमा ल्याएको छ । 

प्राधिकरणले काठमाडौं उपत्यकाभित्रका ग्राहकका लागि छुट्टै कल सेन्टर सञ्चालनमा ल्याएको बुधवार सार्वजनिक सूचना जारी गरी जानकारी दिएको हो । 

ग्राहकको सहजताका लागि विद्युत सेवा आपूर्ति सम्बन्धी गुनासो तथा सूचना एवम् जानकारीहरू एकै स्थानबाट आदान–प्रदान गर्न सकिने गरी पहिलो चरणमा काठमाडौं उपत्यकामा छुट्टै कल सेन्टर सञ्चालनमा ल्याइएको प्राधिकरणले जानकारी दिएको छ । 

यो कल सेन्टर २४ सै घन्टा सञ्चालनमा रहने समेत प्राधिकरणले जानकारी दिएको छ । 

काठमाडौं उपत्यकाभित्र विद्युत आपूर्ति सम्बन्धी कुनै सम्स्या, सूचना तथा गुनासो भएमा विद्युत प्राधिकरणको हटलाइन नम्बर ११५० मा फोन सम्पर्क गरी त्यसपछि १ अंक डायल गरी कल सेन्टरमा जानकारी गराई सेवा लिन सकिने प्राधिकरणले जनाएको छ ।