नेपाल मजदुर किसान पार्टी (नेमकिपा)का सांसद प्रेम सुवालले अमेरिकी सहायक उपविदेशमन्त्री डोनाल्ड लूको नेपाल भ्रमणबारे सरकारको जवाफ माग गरेका छन् । 

शुक्रवार बसेको प्रतिनिधि सभा बैठकको विशेष समयमा सांसद सुवालले अमेरिकी आर्थिक सहयोग कार्यक्रम मिलेनियम च्यालेन्ज कर्पोरेसन (एमसीसी) पास गर्न नेपालका नेताहरूलाई धम्की दिने लू अमेरिकी सैन्य सम्झौता राज्य साझेदारी कार्यक्रम (एसपीपी) अगाडि बढाउन आएको आरोप लगाएका हुन् ।

‘अहिले अमेरिकी मन्त्री नेपाल भ्रमणमा किन आउनु भयो ? एमसीसी पास गराउन गत मंसिरमा नेपाल भ्रमणमा आउनु भएका लू यसपटक पनि आउनु भएको छ । विगतमा नेपालबाट अमेरिका फर्केपछि माघ २७ गते प्रधानमन्त्री शेरबहादुर देउवा, माओवादीका अध्यक्ष प्रचण्ड र प्रतिपक्षी नेता केपी ओलीलाई फोन गरेर एमसीसी पास नगरे नराम्रो हुने भनेर धम्की दिएर तर्साएको र एमसीसी पास गराएको जनतामा चर्चामा छ’ सांसद सुवालले भने, ‘यसपटक पनि धम्की दिएर एसपीपीमा समझदारी गराउन आएको भन्ने जनतामा चर्चा छ । यसबारे सरकारले स्पष्ट गर्न जरुरी छ ।’ 

अमेरिकी सहायक विदेशमन्त्री लू बिहीवार नेपाल भ्रमणमा आएका छन् । नेपाल भ्रमणमा रहँदा उनले प्रधानमन्त्री शेरबहादुर देउवा र परराष्ट्रमन्त्री नारायण खड्कालाई भेट्ने कार्यक्रम छ ।