नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सत्ता गठबन्धन नटुट्ने बताएका छन् । आइतबार बसेको पदाधिकारीको अनौपचारिक बैठकमा प्रचण्डले सत्ता गठबन्धन यथावत रहने बताएका हुन् । 

शनिवार बसेको पदाधिकारी बैठकबाट माओवादी केन्द्रले सरकार गठनको विकल्प खुला गर्ने भनेको थियो । त्यसको २४ घण्टा नबित्दै प्रचण्डले गठबन्धनबाट दायाँ–बायाँ गर्न नमिल्ने बताएका हुन् । 

हिजोको बैठकपछि माओवादी केन्द्रका नेताहरूले सरकार गठनको विषयमा एमालेसँग पनि छलफल हुनसक्ने बताएका थिए । ‘हामी गठबन्धनकै पक्षमा छौँ र हुन्छौँ । गठबन्धन भन्दा दायाँबायाँ गर्ने स्थितिमा छैनौँ’, प्रचण्डले बैठकमा भनेका थिए । 

बैठकपछि माओवादी केन्द्रका महासचिव देव गुरुङले पनि पार्टीले हाल कायम रहेको गठबन्धनको विकल्प नखोजेको बताएका छन् । ‘अहिले गठबन्धनको विकल्पका बारेमा छलफल भएको छैन, गठबन्धन यथावत भएकाले त्यहीँबाट प्रयास हुने कुरा स्वभाविक भइहाल्यो’, गुरूङले भने ।

सरकार गठनको बारेमा छिट्टै गठबन्धनको बैठक बसेर छलफल गर्ने उनले बताए ।