हाबी हुने इटालीको लक्ष्य, ‘सरप्राइज’ नतिजा निकाल्ने स्विट्जरल्यान्डको दाउ

जर्मनीमा जारी युरोकप फूटबल प्रतियोगितामा आज (शनिवार राति)देखि नकआउट चरणका खेल हुँदैछन् । 

पहिलो खेल नेपाली समयअनुसार ९ः४५ बजे इटाली र स्विट्जरल्यान्डबीच हुनेछ । यो खेल बर्लिनमा हुँदैछ । इटाली समूह ‘बी’को र स्विट्जरल्यान्ड समूह ‘ए’को उपविजेताका रुपमा अन्तिम १६ मा पुगेका हुन् ।

यी दुईबीच हालसम्म ६१ खेल भएको छ । जसमा इटाली हाबी छ । उसले २९ खेलमा जीत निकालेको छ । यस्तै स्विट्जरल्यान्डले २४ खेल जितेको छ । दुई टोलीबीच सात पटक बराबरी भएको छ ।

आज पनि स्विट्जरल्यान्डमाथि इटालीले जीत निकाल्ने सम्भावना बढी रहेको फूटबल पण्डितहरूले अनुमान गरेका छन् । यसर्थ साविक विजेता इटाली आज स्विट्जरल्यान्डलाई हराएर क्वार्टरफाइनलमा जान चाहन्छ ।

अर्कोतिर स्विट्जरल्यान्ड पनि ठूला टोलीलाई हराउने विगतको आफ्नो परम्परा दोहोर्याउन चाहन्छ । गत संस्करणको युरोकपमा स्विट्जरल्यान्डले तत्कालीन विश्वविजेता फ्रान्सलाई हराएर अन्तिम १६ बाटै घर फर्काएको थियो । यसर्थ उ आज राति पनि ‘सरप्राइज’ नतिजा दोहोर्याउने लक्ष्यमा हुनेछ ।  

मध्यराति १२ः४५ बजे अर्को खेल हुँदैछ । डर्टमुन्डमा हुने सो खेलमा आयोजक जर्मनीले डेनमार्कको सामना गर्नेछ ।