नेकपा एमाले संसदीय दलका उपनेता सुवासचन्द्र नेम्वाङले सरकार संविधानको मूल्य र मान्यता बमोजिम अगाडि बढ्ने बताएका छन् ।

शुक्रवारको प्रतिनिधिसभा बैठकपछि सञ्चारकर्मीलाई प्रतिक्रिया दिँदै उपनेता नेम्वाङले सरकार संविधानले स्थापित गरेका मूल्य र मान्यता बमोजिम अगाडि बढ्नका लागि दृढ रहेको बताए ।

हालसम्म नेकपा माओवादी केन्द्रले सरकारलाई दिएको समर्थन फिर्ता नलिएको भन्दै उनले समर्थन फिर्ता लिएपछि पनि सरकार संविधान बमोजिम नै अगाडि बढ्ने टिप्पणी गरे ।

‘अहिले सरकार जुन आधारमा उभिएको छ । त्यो आधार अहिले विभाजित भएको छ तर विभाजन पश्चातको जुन दल छ, त्यो दलले आफ्नो विश्वासको मत फिर्ता गरिसकेको अवस्था छैन । त्यसैले जबसम्म विश्वासको मत फिर्ता हुँदैन, तबसम्म सरकारलाई विश्वास प्राप्त भएको मानिन्छ र सरकार रहन्छ । जुन दिन विश्वासको मत फिर्ता हुन्छ, त्यसपछि सरकार संविधान बमोजिम अगाडि बढ्छ । अहिलेको सरकार प्रधानमन्त्री केपी ओली संविधान बमोजिम स्थापित मूल्य र मान्यता बमोजिम अगाडि बढ्नको लागि दृढ हुनुहुन्छ ।’

नेपाली कांग्रेसका सांसद मिनेन्द्र रिजालले केपी ओलीको विकल्पको लागि नेपाली कांग्रेसभित्र एकमत रहेको बताए । सत्ता समीकरणका लागि जनता समाजवादी पार्टीको भूमिका महत्त्वपूर्ण हुने भएकाले जसपा कांग्रेस नेतृत्वमा सरकार बनाउन तयार भए नेपाली कांग्रेस तयार रहेको प्रतिक्रिया दिए ।

‘जसपाको निर्णय महत्त्वपूर्ण छ । उहाँहरू जुन बेला कांग्रेस नेतृत्वको सरकार बनाउन तयार हुनुहुन्छ हामी तयार छौं । अबको परिस्थितिलाई व्यवस्थापन गरेर मुलुकलाई अगाडि लिएर जाने काम नेपाली कांग्रेसको नेतृत्वमा मात्रै सम्भव छ,’ उनले भने ।

जनता समाजवादी पार्टी (जसपा) नेपालका सांसद लक्ष्मणलाल कर्णले जसपाका बन्दीहरू रिहाइ, मुद्दा फिर्ता र संविधान संशोधनको माग पुरा गर्नेलाई समर्थन गर्ने बताए । ‘जसले हाम्रो मागलाई सम्बोधन गर्छ । जसले हाम्रो बन्दी रिहाइ गर्छ । मुद्दा फिर्ता गर्छ । संविधान संशोधन गर्छ हामी त्यसलाई समर्थन गर्छौं त्योबाहेक हाम्रो कुनै एजेण्डा छैन,’ उनले भने ।

नेकपा माओवादी केन्द्रका सांसद राम कार्कीले जसपाले देशलाई प्रतिगमनतिर लान खोज्ने प्रधानमन्त्री ओलीलाई समर्थन नगर्ने विश्वास व्यक्त गरे । उनले भने, ‘हिजो संविधान संशोधनको प्रस्ताव ल्याउँदा त्यसको विरोध कसले गर्‍यो, त्यसको विपक्षमा को उभियो, यो कुरो यति चाँडै बिर्सिने जसपाका नेताहरूले ? जसपाका नेताहरूले त्यो बिर्सेको बहाना गर्नुहुन्छ भने दीर्घकालीन राजनीतिमा त्यसको हिसाबकिताब स्वाभाविक रूपमा राम्रो हुँदैन । हामीलाई के विश्वास छ भने जसपा यदि परिवर्तनको पक्षमा छ भने जसपाले प्रतिगमनतिर देशलाई लैजान खोज्ने प्रधानमन्त्रीलाई समर्थन गरेर आफ्नो बाँकी राजनीतिको हत्या आफैं गर्ने छैन ।’

सांसद कार्कीले जसपाले प्रधानमन्त्री ओलीलाई समर्थन गरे जसपाको राजनीतिक भविष्य राम्रो नहुने पनि बताए ।