एमसीसीका केही प्रावधान आपत्तिजनक छन्, यथास्थितिमा पास गर्न सकिन्न- माधव नेपाल

सत्तारुढ नेकपा (एकीकृत समाजवादी)का अध्यक्ष माधवकुमार नेपालले यथास्थितिमा एमसीसीलाई अनुमोदन गर्न नसकिने बताएका छन् । 

शुक्रवार कैलालीको धनगढीमा आयोजित पत्रकार भेटघाट कार्यक्रममा बोल्दै अध्यक्ष नेपालले यथास्थितिमा एमसीसी सम्झौतालाई संसदबाट अनुमोदन गराउन नसकिने अडानमा आफूहरू कायमै रहेको बताएका हुन् । 

एमसीसी सम्झौताका कतिपय प्रावधान आपत्तिजनक रहेको भन्दै उनले आफूहरूले ती प्रावधानहरूलाई सच्याउन बारम्बार कुरा राख्दा पनि सच्चिन नसकेको गुनासो गरे । अध्यक्ष नेपालले एमसीसी अनुमोदनका लागि अमेरिकाबाट धम्कीपूर्ण अभिव्यक्ति आउनुले पनि यसप्रति अझ बढी आशंका बढाएको तर्क गरे । 

एमसीसी सम्झौताका केही प्रावधानहरू परिवर्तन गर्ने सम्बन्धमा अझै पनि छलफल चलिरहेको उनले बताए । 

‘नेकपा हुँदा नै कार्यदल बनेर अध्ययन गरेको थियो, अध्ययनका केही विषय अगाडि सारिएका थिए । त्यसको अझै सटिक जवाफ आएको छैन,’ उनले भने, ‘अमेरिकाले केही प्रष्ट पार्न खोजेका कुराहरू भए तापनि कतिपय कुराले कन्फ्युजन पैदा गर्‍यो । अमेरिकीहरूका केही अभिव्यक्ति, नेपाललाई दबाब दिने टाइपबाट, धम्की दिने टाइपका शब्दहरू प्रयोग भए, यसले झन् आशंका बढाइदियो ।’

अध्यक्ष नेपालले नेपाललाई कुनै पनि सैन्य गठबन्धन र सुरक्षा रणनीतिको अंगको रुपमा समावेश गर्न नदिने बताए । उनले छिमेकी देशहरूको सुरक्षामा असर पर्ने काम नेपालको भूमिबाट हुन नदिने पनि बताए । 

उनले संसदमा टेबुल गरिएको एमसीसीको सम्बन्धमा नेपालले कसैको दबाबबाट प्रभावित नभई स्वतन्त्र ढंगले निर्णय लिनुपर्ने बताए ।