मोरङ बेलबारी-२ का भवानी रिजाल काम विशेषले काठमाडौं गएका थिए । काम सकेर आज उनी बुद्ध एयरको फ्लाइटबाट घर फर्कन लागेका थिए । 

तर, विराटनगर आए पनि जहाज भने ल्याण्ड भएन । ल्याण्ड गर्ने प्रयास गरे पनि जहाज फेरि काठमाडौं फर्कियो । केहीबेर आकाशमै घुमिरह्यो । 

‘एयर होस्टेसले नआत्तिन आग्रह गरिराखेका थिए तर हामी भने एकदमै आत्तिएका थियौँ,’ उनले भने, ‘कोहीले त ढोका खोल्दिनुस् हामी हामफालेर भए पनि ज्यान जोगाउँछौं भन्दै कराए ।’​

यो पनि पढ्नुहोस्

एक यात्रुको त्रासदीपूर्ण अनुभव: विमानस्थलमा भीडभाड देखेपछि बाँचिन्न भनेर रुवाबासी शुरू भयो

जहाजमै रहेकी कविता अधिकारीलाई पनि आज बाँच्छु जस्तो लागेको थिएन । आफ्नो भन्दा बढी चिन्ता आफ्नो बच्चाको लागेको उनले बताइन् । ‘काठमाडौं घरबाट दमक माइत जान छोराछोरीसहित आएको हुँ,’ उनले भनिन्, ‘आज बाँच्छु जस्तो लागेको थिएन, धन्य अहिले नै मर्न जुरेको रहेनछ ।’ 

प्रदेश १ का आर्थिक मामिला मन्त्रालयका कर्मचारी गोविन्द आचार्य पनि सोही जहाजमा थिए । 

‘बिहान ८ः०५ मा उडेको जहाज करीब ९ बजेतिर विराटनगर पुग्न लाग्दा जहाज ल्यान्ड हुन नसकेको कुरा थाहा पायौँ,’ उनले भने, ‘काठमाडौंमा धेरैबेर आकाशमा होल्ड हुँदा धेरैको रुवाबासी चलेको थियो, हामीले केहीलाई सम्झायौँ पनि ।’​

यो पनि पढ्नुहाेस्

यसरी गरेको थियो बुद्ध एयरको जहाजले आकस्मिक अवतरण [भिडियोसहित]

सुन्दरहरैँचा–१२ का हिमेश काफ्लेले यात्रा एकदमै त्रासदीपूर्ण रहेको बताए । ‘काठमाडौं पुग्दासम्म पनि एयर होस्टेसले केही भएको छैन, सामान्य समस्या हो नआत्तिनुस् भनेर ढाडस दिइरहेका थिए,’ उनले भने, ‘तर त्रिभुवन विमानस्थलमा प्रहरी, दमकल देख्दा अब चाहिँ नबाँचिने रहेछ भन्ने लागेको थियो ।’

एयर होस्टेसले पनि अन्तिम समयमा मात्रै घटनाबारे साँचो जानकारी दिएको उनको भनाइ छ। 

चालक दलका सदस्यले सफलतापूर्वक अवतरण गराएपछि भने आफूहरूले नयाँ जीवन पाएको महसुस भएको यात्रुहरूले बताए । ​

यो पनि पढ्नुहोस्

आकस्मिक अवतरण गर्नुपर्ने गरी के भएको थियो बुद्धको विमानमा ?

विराटनगर विमानस्थल प्रमुख उत्सवराज खरेल पाइलटको सावधानीका कारण जहाज दुर्घटना हुनबाट बचेको बताउँछन् । उनका अनुसार चक्का नखुलेपछि काठमाडौं जान पाइलटले अनुमति मागेका थिए । ‘हामी पनि फोर्स ल्यान्डिङ गर्ने तयारी अवस्थामा थियौँ, दमकललगायत आवश्यक सामग्री तयारी अवस्थामा राखेका थियौं ।’ 

यो पनि पढ्नुहोस्

ककपिटमा चक्का खुल्ने इन्डिकेटर नबलेपछि अलमलिए पाइलट, काठमाडौंमा गरियो आकस्मिक अवतरण

जहाजको गियर (चक्का) खुलेको र लक पनि भएको कुरा ड्यासबोर्डमा इन्डिकेट गर्ने इन्डिकेटरमा बत्ती नबल्दा जहाज अवतरण हुन सकिरहेको थिएन ।

काठमाडौंमा सफल अवतरण गरिएपछि विमानमा सवार ७३ यात्रु र चालक दलका ४ सदस्यको ज्यान जोगिएको छ।

यो पनि पढ्नुहोस्

आकस्मिक अवतरण गरेको बुद्ध एयरका ४३ जनालाई विराटनगर पठाइयो, अरु यात्रु काठमाडौंमै बसे